Биир дойдулаахпыт Надежда Тюляхова маастар кылааһа 

Биир дойдулаахпыт, Өргүөт нэһилиэгин ытыктанар олохтооҕо Надежда Игоревна Тюляхова Үөһээ Бүлүү улууһун оройуоннааҕы культуура дьиэтигэр "Салама ситиитин хатыы" уонна “Сылаас сиэдэрэй олбох" маастар кылаастарын тэрийэн ыытта.

 Сылгы айылгыта саха омугу кытары ыкса сибээстээх. Тэтиммит, туттар-хаптар хамсаныыбыт, майгыбыт-сигилибит, өйбүт-санаабыт сылгы тэтимэ тэтимнээх. 

Сылгы мэлдьи таһырдьа сылдьар кыыл буолан, күн эниэргийэтин күүскэ иҥэринэр, мунньунар уратылаах. Ол иһин дэйбииринэн киһини ыраастаан ауратын көннөрөллөр, батыһа сылдьар араас дьайыыны үүрэллэр. 

Сылгы сиэлиттэн араас таҥаһы-сабы өрүөххэ сөп. Холобур, түбэтиэйкэни оҥорорго сүүмэхтэри сотолоругар аалан быа өрөн таһаараллар, ол кэннэ бу быаны күн эргиирин хоту кылынан ситимнээн өрө таһаараллар эбит. Сорохтор сиэли уонна кылы эҥин араас станогунан, дрелинэн эрийтэрэн таҥас оҥороллор. Ол гынан баран норуот маастара илиитин иминэн тутан-хабан оҥорбута ордук үйэлээх уонна сылаас тыыннаах буолар дииллэр.